更多
2024-02-03
1167 瀏覽
依家啲人成日話服務差,大家真係要搵個會員然後帶隊嚟呢間試吓,佢啲侍應個個都好細心好窩心,直頭好似屋企人一樣,真係好耐冇試過遇到一班咁好嘅侍應生。好啦,跟住講返啲嘢食,樣樣質素都好高而且價錢亦都非常相宜,中環食晏飲茶每人唔使$300 ,連埋咁高嘅服務質素,真係超值。蝦餃晶瑩剔透皮薄餡靚,入面隻蝦好新鮮又夠爽口彈牙。呢個雪山包好似係鎮店之寶之一,軟熟鬆化。兩面黃肉絲炒麵又係高水準之作,雖然肉絲芽菜同埋啲汁淋咗喺面,但係個面仍然係卜卜脆好正。呢個炸墨魚丸足料非常,一攞到埋嚟直頭聞到墨魚嘅香味,識落唔會成舊都係粉而冇乜墨魚。呢個蝦腸又係不得了,淨係塊腸粉皮都已經贏晒。我哋仲叫咗杏汁豬肺湯,味道香濃,豬肺加埋瘦肉同埋雞腳等材料,超正。
張貼