同心泰國菜館

營業中

休息中

約咗朋友食好耐冇食過嘅泰國菜，首選一定係諗住係九龍城揾食。揾到一間幾正宗又抵食嘅試試佢。兩個女仔係好餓嘅情況下叫咗一個咖哩、一份蒜蓉包、一碟菜、一碟炒粉、一份魷魚同埋一人一杯飲品。炭燒鮮魷好大條，即燒，食落肉質好嫩好易咬，佢配咗個酸辣醬汁(有啲似點生蝦果個汁)一齊食。泰式黃咖哩雞一個小砂煲上唔太辣但好香，偏水一啲，鍋入面都好足料。另外叫咗一份蒜蓉包，個法包都唔係hea，面頭有啲生蒜，夠晒味。馬拉盞炒椰菜苗泰國餐廳一定要食馬拉盞炒菜，今日揀咗從來未食過嘅椰菜苗。食落好爽口，炒真係好好食，仲有啲蝦米。豬頸肉炒捲心粉好出色好好食，又係第一次接觸捲心粉。個粉好似河粉但捲埋然後切到不規矩咁，但佢比一般河粉煙韌，食落好有鑊氣。好簡單嘅料(芽菜，蔥，蛋，豬頸肉)但炒埋一齊好好食。兩杯飲品 : 青檸沙冰 & 珍多冰正常發揮，冇乜特別。整體佢啲碟頭都幾大，啲野都係即叫即炒，feel到係有啲鑊氣，當中我最推介嘅係炒捲心粉同炒椰菜苗。Menu都幾多選擇，比較適合多啲人一齊去食。環境都闊落，幾’麻甩’，有啲似飯堂嘅感覺，但都幾嘈下，約一大班人黎食應該幾開心。