酒泉日本料理 (已結業)

今日行完山返元朗揾食，因為好想食三文魚，所以提議去食日本野。因為唔想排太耐，所以揀左內街的酒泉。雖然係內街，但因為星期六，所以人好多，等左成8個字先有5人枱。入到去，其實都好迫，張枱好細，叫多幾樣餸，會迫爆。朋友們好似餓鬼咁，係咁點壽司，又要點烏冬又點沙律，好瘋狂。元朗壽司出名大件，佢地真係無得救。啲野等左大概10分鐘，陸續有黎。啲三文魚壽司，件三文魚好長，三文魚唔算特別肥，但過口癮都不錯。鰻魚好大件，見到都開心，啲鰻魚肉好好食，加埋啲醬汁，一流。至於烏冬係好滑，但因為味道太淡，我唔特別鍾意。帶子壽司啖啖肉，好鮮甜，啲壽司其實好食得過，因為上面件料，不欺場，份量十足。三文魚子沙律好大碗，沙律醬超多，不過可能青瓜絲未乾水，所以撈左之後其實好水，而且三文魚子唔夠多，食到最後，剩返好多青瓜絲。食到最後，壽司剩返好多飯，因為啲飯實在太大嚿，好浪費，唉。整體黎講，呢度食物份量十足，味道不錯，雖未至於高水準，但行完山，踩完單車黎食返餐，係不錯，但就唔好瘋狂咁點，因為最後眼大肚窄就好浪費。