川粵時光 (已結業)

一直都幾鍾意係V Point試唔同嘅餐廳，不論同事聚餐，或是約客食飯，唔少餐廳都幾適合。大樓夠新，具時代感，無論係川粵時光，或是其他餐廳，底都好高，空間感足夠，坐落亦覺得十分舒適。踏進大門已感受到果種精緻高級新派中菜嘅感覺，位與位之間嘅間距合理，唔會太嘈，仲可以靜靜地傾下偈。口水雞：醬汁幾濃郁，味道辛香，口味川麻，但唔會太辣。雞件夠入味，肉質亦夠嫩滑。酸辣魚皮：一款微辣口味嘅冷盤前菜，「真」魚皮非常Q彈爽滑，既酸且辣，美味之餘，都幾開胃。青椒皮蛋：溏心皮蛋配小辣嘅青椒絲，味道香，口感順滑，加埋辣辣地嘅青椒絲，幾惹味。黃金椰菜花：又係好惹味嘅一款時蔬，簡單黎講就係鹹蛋黃醬炒椰菜花，鹹蛋黃香豐富，口味濃郁，平凡椰草花即時變得不平凡。青椒開胃清香鱸魚：基本上同泡椒口味差唔多，湯底鮮甜得黎，又帶酸辣，都幾開胃惹味。鱸魚片十分肥美厚肉，魚肉幼嫩鮮味，幾好食。除左魚片，仲有竹荀，以及大量黑薯粉，質感都幾Q彈。紅糖冰粉：食完辣野通常都會食返落紅糖冰粉中和返，有啲人會覺得解辣（雖然今日食嘅野唔會好辣）。但其實味道都唔錯嘅，啫喱般嘅質感非常順滑，微甜，唔會太膩。