Amour Garden Grill & Bar (已結業)

今日放工約左個朋友係旺角食飯，又想搵個靜靜地既地位傾下計，朋友就介紹左我去amour garden grill & bar。原來係樓上舖，一入到去就好有「家的感覺」，坐係sofa到自成一角，可以慢慢咁傾計！出面戶外地方可以BBQ，下次可以同朋友尼試下係鬧市中BBQ！舖頭女仔介紹我地食左個二人餐。田園沙律作為頭盤真係無得頂，最緊要夠新鮮，仲有我超鍾意既芝麻醬同蕃茄仔！跟住就食蜜糖雞翼，入口已經滿口蜜糖，一咬就會發現雞翼入面既肉都有蜜糖味，真係好似啖啖蜜糖！主菜係白酒蒜香意大利粉，一上枱，我地已經：「WOW!」超多硯圍住成碗意粉，仲要粒粒有肉，絕對足料！蒜香味濃，岩晒我胃口！再尼就係黑松露海蝦意大利飯，一碟有成7隻大海蝦，仲要每啖飯都有黑松露味，正丫！最後甜品我揀左朱古力軟餅配雪糕，最初以為同普通市面既差不多，食落先發現濃濃朱古力味，仲好有層次感！舖頭女仔話特別入貨嫁！如果想係旺角鬧市搵個地方同朋友靜靜地傾計食飯，amour garden grill & bar真係唔錯既選擇！