茶狼 (已結業)

本身都鍾意飲啲台式茶飲，尤其珍珠鮮奶茶、花果茶，但就真喺好少專登買杯嚟周街飲，上次，晌「天仁茗茶」試咗杯黑糖珍珠鮮奶茶，都喺拎番公司慢慢嘆；今次，晌「茶狼」所試嘅黑糖珍珠鮮奶茶，同樣拎番公司慢慢嘆，尤其依家仲喺疫情反反覆覆嘅情況，晌公司飲就安心啲，再加幾件餅當下午茶，鬆一鬆。「茶狼」嘅飲品選擇都幾多元化，但睇落就好似好難分為咩類別，總之花果茶、水果茶、奶蓋、珍珠鮮奶茶……好多選擇啦。沖繩多良間島黑糖珍珠鮮奶碳焙烏龍茶 $36小弟就真喺幾偏好黑糖嘅味道，所以，揀咗呢一款特別標明黑糖喺嚟自沖繩多良間島，其實，相信名大於實，溝咗落啲奶茶度，都較難分別出啲黑糖質素高到去邊，不過，聽落個名就好似好勁咁囉。而碳焙烏龍茶嘅味道都OK，茶味都幾香，口感亦不俗，頗順滑，但喺，啲珍珠就好一般，唔叫得QQ，反而有少少腍腍哋嘅感覺。初嚐「茶狼」嘅出品，算喺叫OK啦，不過，啲服務真喺麻麻哋，我幫襯時人客唔多，但個店員不停講電話，我棟晌佢面前準備落單，佢都好似未有理會。結果，就喺晌佢一邊講電話之下，一邊落單，態度麻麻，似喺做多一個客唔多，少一個客亦唔少。