一鍋豐 (已結業)

一行四人打邊爐，當然要選任食2小時嘅餐廳啦，如果唔係，傾得計嚟又食唔切野，食得野嚟又傾唔到計，何必呢? 今次呢間係朋友食過幾好，所以約我地去再食。先講食物種類，佢地有4款級數嘅套餐，原隻龍蝦刺身餐、象拔蚌餐、鮑魚餐、特色餐，豐儉由人，可以選嘅打邊爐食物都多款，而且新鮮。佢地仲有得每位加28蚊有8款刺身任食，抵啦! 我經過刺身吧都見佢d野幾靚，不過我地有兩個人唔食生野，所以冇點到。我地叫咗鮑魚海鮮餐，一睇個海鮮併盤已經流口水啦，有5款海鮮，樣樣都大大件，好豪爽。湯底係蕃茄蜆湯，鮮甜!菜單中我想推介：美國三角肥牛 - 肉質好，牛味香!海蝦 - 新鮮大隻! 全部唔黐殼! 羊肉粒 - 一咬即feel到羊味嘅強勁，肉質稔滑。芝士豆腐 - 我知呢個唔係自家製，但我好鍾意食，好味呀!飲品係自取嘅，我較為喜歡韓國的蜂蜜梨飲品，都飲咗三罐，而朋友就飲啤酒。客人自助雪糕corner都唔錯，有2款口味，我覺得我可以去賣雪糕，睇相就知我整得幾靚。如果唔整雪糕，佢地仲有雪條同雪米糍揀。總括一個字…「豐」!