火車頭越南餐室 (朗豪坊)

營業中

休息中

夏日炎炎，加上戴住個口罩焗住，都無咩胃口。午飯時間，見到呢間越南餐廳幾多人，午市套餐包小食同飲品，都好多選擇，決定試試。心大心細，最後揀咗香茅牛肉湯河（$79），小食就揀咗牛油果素米紙卷，飲品就揀咗凍士多啤梨綠茶（跟餐唔洗加錢）。等咗一陣，米紙卷就黎喇，賣相好靚，食落感覺好清新，紅蘿蔔、粉絲、菜酸酸甜甜，幾醒胃，不過牛油果就細舊咗少少...個醬汁似稀稀地既甜醬，加花生碎。跟住到湯河，份量比想像中大，牛肉都好多，而且肥瘦適中，一咬落去有陣淡淡既香茅味，不過質感略嫌「鞋口」，牛味亦欠奉。唔知生牛肉會唔會無咁鞋呢... 河粉就好滑，湯底偏淡，要加少少魚露提鮮。至於飲品，凍士多啤梨綠茶就好似一般台式飲料，味道偏甜，有幾粒迷你士多啤梨粒粒漂浮，望住都覺得熱氣全消。埋單$79再加一，喺旺角黎講算合理。