大澳德發 (已結業)

上個禮拜入大澳食海鲜意猶未盡，今日來到銅鑼灣，見到呢間『大澳德發』，諗住實有海鮮食就毫不猶豫入咗來，有幾款孖寶食，嗌咗『頭抽乾煎海中蝦』+『酒香鮑魚』(4隻)呢份，有我呢個『海鮮痴』鍾意嘅蝦同鮑魚，哈哈。海中蝦本身蝦味濃郁，頭抽來煎多咗豉油味，更加香口似又唔會搶咗蝦味，非常好。鮑魚有4隻，每人2隻好滿足，酒香中又有些少甜味令到彈牙鮑魚更添滋味。『金磚豆腐拼花枝餅』係『德發』必食推介名單中，豆腐外脆内軟，花枝餅食得到有咬口嘅花枝粒，都係入大澳必食食品，來到『大澳德發』亦必食。晚市幫襯400蚊，即送『 蒜蓉焗生蠔』(2隻)，以每張單計，咁好似2個人抵D喎，拍拖嘅朋友就啱晒。