潮成園正宗手打牛丸大王

營業中

休息中

【屯門區】【潮成園】好耐冇做屯門區，以十八區 foodie 嚟講真係失德敗行，嚟緊會再忙啲，所以我都要諗好唔好改名，唔好吹到咁大。網上睇好多吹到好大嘅，好多時都係空頭支票，我唔想自己都係咁。雖然我明知冇乜人睇我，但我都唔想咁嘛。咁喺改名之前就不如盡力踏實啲做好佢，雖然唔知女同事而家仲有冇睇我寫嘢，但係就算佢唔睇，都當自己做好一件事佢，唔好好似港鐵新動力咁。而今次嚟到屯門碼頭呢邊見到呢間「潮成園正宗手打牛丸大王」，就有興趣。見佢燈火通明咁，間嘢企企理理就入去，用 $43 叫個「牛腩牛雜粗麵」，普通咗啲，係牛肚幾爽口令我留下印象。加 $3 飲杯「熱檸茶」，侍應阿姐係咁話抵，咁咪叫埋。我食嘅呢日係香港天氣轉凍嘅第一日，叫熱飲合理吧。大家睇開我去粉麵店啲 post 就知我實叫多碗嘢嚟娛吓賓，放心我係會食嘅。叫個 $28 嘅淨「彈牙雙丸」，即係爽滑牛丸拼自製魚蛋，侍應哥仔話每樣兩粒，冇淨牛丸六粒咁抵。之但係我為咗影多樣畀大家睇，都係要雙拼。碗嘢上到嚟係每樣有三粒，牛丸係爆汁嗰隻，幾好食，魚蛋都 okay，成件事幾好。食埋 $20 嘅「香脆帶骨魚皮」，佢唔係即炸，係厚身啲嗰款，脆得嚟魚味都濃，唔錯