皇后餃子 (已結業)

【沙田區】【皇后餃子】之前喺 1am0500 已經寫過佢灣仔店，仲被飲食達人 Miss Ding 話我講杯 $5 嘅凍豆漿都要用一句嘅篇幅，相當有趣。點知間嘢最近新開埋過嚟沙田，我梗係要去試吓，畢竟都算叫做近我屋企，冇理由食都唔食吓咁得意嘅。首先入到去就覺得周身唔聚財，環境唔算非常整潔之餘，冷氣亦都欠奉，隔離枱有個客都好似好熱咁，唔止我咁認為。不過我本住一個排除萬難都要為讀者提供資訊嘅心，就頂硬上，最多叫杯凍飲，然後嗱嗱聲食完走嘅啫。上次食咗餃子，今次叫個佢哋嘅「精選套餐」嚟玩吓，主食嘅「招牌皇后粉麵」我揀咗「南乳豬手湯麵」，個麵轉河粉。有個優點就係佢哋個豬手會另上，保持到南乳味，缺點係其實味道上都唔係話太過突出，另上都冇乜用。套餐配「小食」，我要咗「炸雲呑」，比想像中細隻，其實味道都唔會食到啲乜，細細粒冇特別。而佢仲有「涼拌兩款口味」，係「陳醋雲耳」以及「麻辣青瓜」，我不嬲唔多好呢啲涼菜，所以都冇乜感覺，可能有人中意。個餐仲有「凍熱飲品」，咁餐飲方面因為第二段提及過嘅餐廳溫度問題，而且又喺灣仔店飲過「凍豆漿」，所以我要咗「凍檸茶」少甜，都係一般咁啦，本身都冇期望啲乜就冇失望。不過咁樣