喜運點心專門店 (已結業)

【沙田區】【喜運點心專門店】朋友會計妹就快移民，移之前去石門攞新身份證，咁近我屋企就梗係順便食個飯。嚟到呢間點心舖首先就叫咗 $33 嘅「喜運鮮蝦餃」，用得餐廳名嚟命名都唔會太差吧。只係有幾隻個皮係穿嘅，影響咗個感覺，味道係可以。之後食埋 $30 嘅「懷舊糯米雞」，佢味道係幾好，不過一路掛住食完全唔記得影相，足以證明係真係幾好嘅。跟住到 $24 嘅「紫醉金迷流沙包」，聞說係呢度嘅名物之一，食落去個流沙效果唔錯，味道唔會太濃，幾啱我食。食埋 $35 嘅「百花釀魚肚」，好似係一塊魚滑放喺魚肚上面咁，兩樣嘢都唔錯。就咁嘅話，我哋就實唔夠飽，所以另外我哋仲叫咗 $29 嘅「明爐叉燒滑腸粉」，啲叉燒又真係 okay，啲腸粉本身算係香滑，成件事加埋係幾好嘅。跟住到 $26 嘅「雞粒鹹水角」，熱辣辣，好味，冇叫錯。之後都係 $26 嘅「蠔皇鮮竹卷」，水準都高。整體嚟講，連埋茶位 $6 一位之下，呢度 $209 兩個人，一人舊零水食呢啲嘢，我覺得係可以嘅，不過讚得太勁又話我打手。。。（地址：沙田石門安群街3號京瑞廣場1期地下30C號舖）