雲南桂林過橋米線

營業中

休息中

【油尖旺區】【雲南桂林過橋米線】以前尖沙咀好多宵夜食，而家好似冇晒咁。好大程度上都係貧窮限制選擇，如果有錢啲，呢度都好多 bar 可以入去食少少嘢飲啲嘢咁。只不過如果講正餐就少之又少，就算係 bar 嗰啲，都可能會係廚房收咗工，得返小食咁。同道歉哥行到赫德道附近見到呢間，都真係冇乜選擇喇，咁就唯有食呢間米線啦。本身冇預食米線嘅，所以都冇乜 idea，求其揀咗個 $47 嘅「黃酒雞湯米線」，佢個餐牌聲稱係有紅棗、雞件、薑片同埋黃酒，但食落唔算好濃。而我本身仲加 $7 加咗餸，要「腩肉（微辣）」嘅，不過佢冇畀我，講一聲之後變咗另上，仲好，味道正常啦，咁樣碗就變咗 $54 喇。道歉哥就叫咗 $35 嘅「小鍋米線」，配個「腩肉（微辣）」做餸，辣度方面就要小小辣。而佢都有加餸，係 $7 嘅「魚肉春卷」，咁就變咗 $42，佢話碗嘢都 okay 嘅。張單另外仲有 $14 係嘢飲錢，我飲「枝裝豆漿」，道歉哥飲「罐裝可樂」，都係咁啦，可以有咩突破。全單總共 $110，以求其隊個宵夜嚟講唔貴。。。（地址：尖沙咀赫德道5-9號德裕中心地下5-6號舖）#1amfoodie #foodie #hkfoodie