綠林三記甜品 (已結業)

【深水埗區】【三記甜品】喺深水埗嗰邊食完飯，自然想食吓甜品。嗰頭其實都幾多選擇，有求學時期成日食嘅松記，平靚正啱晒任何階層。之後有一段時間我係比較中意另一間好似係叫三姐松記嘅，因為冇咁逼、食得冇咁趕時間同埋啲雪糕好食啲。好耐冇過嚟呢邊之下，見到八仙餅店近油站嗰邊仲有間叫「綠林三記」嘅糖水舖，作為八卦精嘅我梗係入去叼碗 $33 嘅「楊枝甘露」感受吓。唔係講笑，街坊糖水嚟講佢呢碗算唔差，所以一直都想等下次有機會再嚟食先寫嘢。點知下次去到連名都改埋叫「三記」，不過啲設定完全一樣，似換湯唔換藥。一望餐牌，「楊枝甘露」變咗 $37，嘩！算喇，食個 $34 嘅「芒果班戟」睇睇，嗰吓有啲想食，上菜見佢係外賣膠盒放返上碟，但都整得幾好食喎。唔知仲有冇機會再嚟，叫多個 $24 嘅「豆花布甸」嚟睇吓。味道又幾特別，真係有豆香嘅布甸，而且係冇違和感嘅，都幾好。總括而言呢間嘢嘅出品都係唔錯嘅，難怪我兩次去到都見到佢哋堂食同埋外賣嘅生意都幾好。。。（地址：深水埗元州街9號景業大廈地下）