B哥車仔麵 (已結業)

放晏時間呢邊特別多人，呢間係新開嘅車仔麵，趁未係好多人，快啲試頭啖湯先。間鋪比較隱蔽，係板上個位轉入去。有高枱坐，初初以為會唔舒服，又ok喎。好耐無食車仔麵，咩都想食。除左麵底，仲有小食可以揀，啱哂。朋友個碗超滿，我地都叫左4餸。朋友唔記得圈走辣，預設左個底係有小小辣，不過佢食得到。菜好新鮮，而且好多。炸墨丸腐皮有驚喜，好滿滿，而且味道不錯。絕對要推介嘅係豬紅，好滑，完全唔「鞋」。呢邊第二碗都有，蘿蔔係已經超級入味，咬落去啲水已經湧哂出黎。朋友話個豬皮又係好好味，夠哂味道。我個碗我自己好鍾意，辣腩仔肉係好好味，辣味剛好，肥瘦剛好，肉味出得黎，辣味唔會搶，反而開胃左。墨丸大大粒，非常足料。我自己好喜歡粗麵，掛湯唔錯。廚房好細心，有啲餸分開上，呢個係甜酸齋，質地同我地平時食嘅唔同，好似油炸鬼咁，但硬啲厚啲，味道係一樣。雞翼要介紹下，首先係脆口，熱上，咬落無幾耐，淡淡嘅香茅就飄出黎，但你係見唔到有粉定茅，唔會太濃，幾好。飲品我地都點咗特飲，跟餐加14元，有青檬梳打、咸七，我個人好喜歡我自己點嘅奶茶紅豆，奶茶本身係我至愛，紅豆夠哂沙，呢杯就值得。車麵坐得舒服嘅通常好少，呢間有驚喜。