米亭 (已結業)

阿叔最鍾意飲湯，之前睇咗朋友介紹呢間位於深水埗嘅餃子小店，深深畀佢嘅花膠雞湯吸引。心諗既然自己都好一段時間無嚟深水埗啡遊，不如就嚟一次飲啡兼飲湯啦！ 呢間餃子店嘅價錢都幾親民，餃子套餐都係由$58起，可揀白菜或韮菜豬肉餃，如果想食好啲，就可以好似阿叔咁加$15叫山珍松露雞肉餃或者米亭和牛餃，當然建議你加多$15轉埋特濃花膠雞湯啦！ 餃子餐嚟到，當然第一時間咩都唔食，飲啖湯先。網上搵資料，知道佢哋每鍋嘅雞湯都用上16個鐘頭熬製，之後加入煎過嘅雞殼再煲多6個鐘先至完成，所以顏色呈金黃色，而且味道果然同朋友講嘅一樣，非常濃郁。加埋雞腳2隻同花膠3件，呢$15加得好值！ 山珍松露雞肉餃，雖然餃子嘅松露味唔算太突出，不過勝在用料豐富，隻隻餃子都實的的，入邊餡料除咗雞肉外，更有木耳，食晒6隻再飲埋成碗湯都幾飽架！ 米亭和牛餃，比起山珍松露雞肉餃，呢款餃嘅味道濃郁好多，而且帶點油脂香，不過阿叔就建議食呢款餃嘅湯底可以揀番啲清少少，例如豆乳豚骨湯，咁就唔會食得太膩喇！