J'aime bien Patisserie (已結業)

自從幾年前喺呢度食過一件士多啤梨香檳蛋糕之後，我都一直念念不忘。今日翻返嚟呢度，點知已經搵唔番嗰一款蛋糕，都真係有少少唔開心。如果想知道呢度有咩蛋糕買，你可以睇睇牆壁上面嘅羊毛蛋糕模型，每一個蛋糕模型都係用羊毛拮出嚟，好有心思！喺餐牌度搵到另一件我想試吓嘅蛋糕，就係第一件Sabrina。呢件蛋糕比較特別，如果有細心留意，都知道蛋糕嘅分層通常都係打橫，但呢件Sabrina嘅每一層都係垂直，真係好考蛋糕師傅嘅技巧。蛋糕有士多啤梨嘅清香，海綿蛋糕嘅蛋香，面頭有朱古力，底下仲有脆脆，無論係口感定係味道，層次都非常豐富。除咗呢件蛋糕之外，仲有其他口味我都覺得幾吸引，下次會再嚟試吓其他蛋糕。