一樂食館 (已結業)

本來鮎魚打八號的話，休息的星期六，可以訓晏ｄ，但奈何仍然要返學，返學之餘，也順便出中環搵食。搵食之途，順路去看看豚王，未開；蘭芳園，剛吃過了；勝香園，排得黎都夠鐘；最後到波記，竟然修路無開檔。黑到爆之餘，時間都所餘無幾，無法，只好見乜食乜。黎到一樂門口，才發現以前食開的粉麵檔沒了，只剩一樂一間在獨樂樂。中環，從來都是貴租之地。坐底左，先發覺原來在中環返工咁多年都無幫襯過，再一次證明有緣始終會再見。環顧咁多檯都係叫燒味，我也叫了一碟叉燒燒鵝飯試試。餸不算很多，但也剛好足夠扒晒一碟飯。叉鵝飯的鵝的確是鵝不是鴨，跟後面街的鏞記相比，這裡的鵝是脆皮燒鵝，鵝味也很香，但價錢平一截，燒鵝既味道，蔗渣既價錢又一例證。叉燒好香，未知是用了甚麼調味料？但叉燒有點過肥，下次都係叫瘦叉比較好。在中環一帶的燒味，龍記多元化，鏞記名氣大，一樂，會否是蒼海遺珠?以極速吃完碟飯，又差ｄ遲到，下次再來，已不知何年何日，希望小店能繼續做下去吧。