巴辣仔烤魚雞煲 (加連威老道) (已結業)

好耐無食烤魚，本身想約朋友食，但發現原來巴辣仔午市有一人烤魚食，所以特登自己一個人嚟食。一人烤魚有花鱸魚同沙巴龍躉可供選擇，本身諗住食花鱸魚，但當日就只有沙巴龍躉，價錢就貴少少，要$138。 落單後等咗幾分鐘烤魚就上枱，雖然係一人份量但其實都幾大盤。烤魚用爐烘住，湯底滾到出晒煙熱辣辣烤魚有先炸過先放入盤同麻辣醬汁一齊煮，所以食落魚皮香口，裡面魚肉嫰滑無腥味。沙巴龍躉夠厚肉，好容易就夾到啖啖魚肉食。將魚肉蘸麻辣醬汁食好惹味，而且醬汁重口味得嚟唔會太過味精，主要係麻辣嘅香料味。配料方面有芫茜、大豆芽、豆卜同海帶，幾款都係好吸麻辣汁嘅材料。烤魚可配白飯或薯粉，我揀咗薯粉。薯粉係放湯另上，幾有誠意。我想食辣啲所以將薯粉放落煮下先食，索晒啲麻辣汁好好味薯粉份量好多，所以最後食剩咗少少。整體嚟講烤魚好味，沙巴龍躉新鮮又厚肉，而且份量大。一個人都可以食到好味烤魚好開心。