串燒燒烤專門店 (已結業)

今日放早，早左成個鐘個friend先出到黎同我去買波鞋，未到時間一條友最初諗住食個下午餐，行左幾間茶餐廳都唔知想食咩。anyway，最後決定係試下一人串燒。餐廳佈置好舒服，所有嘢都係黑白為主再用紅色做highlight，餐檯，餐牌，鹽同胡椒粉樽，連牆身嘅畫都係黑白紅三色。非常細心的設計，值得欣賞！串燒選擇好多，我專登揀啲細份量啲嘅，精心挑選之後order左三碟，有香草牛油燒花甲，海鹽燒瀨尿蝦同秘制大蔥雞串。先講花甲，雖然花甲唔係好大但係連同青椒紅椒一齊燒係真係唔錯，同泰國啲燒唔同，呢度無同醬料一齊上，相反地咁先食到新鮮嘅花甲味。燒瀨尿蝦係我今個下午茶嘅最愛，瀨尿蝦超級大隻，廚師燒得剛剛好，啲肉好好食，好實，由於瀨尿蝦size唔細，都幾多肉食下。我加左啲胡椒一齊仲香啲添！最後輪到飽肚啲嘅大蔥雞串，同樣地廚師燒得剛剛好，大蔥咁燒法都係第一食，加有小小鹽鹽嘅醬料味，雞肉連同燒到香口嘅大蔥一齊食落口，好夾，值得一試嘅。