板長壽司 (已結業)

星期四下午2點半突然想食日本嘢但唔想食魚生。好彩板長仲有午餐，有熟食定食選擇~餐廳坐唔滿，坐梳化尚算舒服。不過員工態度散漫，叫咗幾次先加水同埋單。今次叫咗個西京比目魚定食($95)。等咗20分鐘先上菜，好肚餓呀～成盤定食望落好豐富，有6樣嘢食。芝麻醬粟米沙律不過不失。前菜有兩條醬油茄子，未見出色。麵豉湯不但有昆布，仲有冬瓜，總算多料。比目魚嫩滑香口，就算唔加附上嘅沙律醬都好好味。會不知不覺咁食曬成碗白飯。白飯唔硬，但一定唔係日本米。茶碗蒸。留到最後先食仲暖嘅。蒸蛋滑身夠味，裡面有一塊日本魚蛋同一條蟹柳。為一餐做個完美句號~總結係，壽司舖嘅另類選擇，不妨一試~