Bifteck (已結業)

東瀛遊前工作忙碌，開OT唔想叫外賣，所以就喺附近QRE Plaza搵咗間西餐廳「Bifteck」享用一個人的晚餐。佔用面積全層嘅餐廳不用花巧之裝潢，環境開揚有格調，光線柔和，厚墊椅櫈十分舒適。四周以綠葉盆栽點綴，感覺清新有生氣。一頁英文餐牌簡單易明。雖然樓面只有一位外籍服務生駐守，全權負責落單、傳菜、斟水、埋單等工作，效率甚高！餐桌有齊備嘅自用餐具，衛生簡潔。Grilled Hanger Steak（$398）：三成熟嘅牛扒紅潤軟腍，肉味香濃，牛味好出，喺面灑上鹽粒及黏上蘑菇秘醬已夠芳香惹味。配角紫椰菜絲爽脆尤甚，酸酸甜甜，十分消滯，撈入另上嘅薯蓉，組合極之恰配！鬧市中的樓上西餐廳「Bifteck」優雅寫意，食物高質味佳，價格合理，一人用餐都十分享受，誠意推介！