Viet Dating (已結業)

Lunch time好多時都唔太肚餓，可能因為多野做有壓力，又可能公司附近食嚟食去都係嗰d野，太悶唔知食咩好。今日突然諗起之前行去禧利街途中有間越南法包喎，一於去試下。呢間店前身係賣沙律，轉左手後格局相似，保留返落地大玻璃窗、櫃面雪櫃同幾張高櫈。法包有四款，第一次嚟當然要試下classic先，材料有兩款扎肉、豬肉粒、越式醬、酸蘿白、莞茜等，包埋一杯熱青檸茶或蓮花茶，合共$46。法包係即叫即整，所以要等約8分鐘，不過坐喺玻璃窗前望住人來人往嘅街道放空一下，時間好快過。麵包夠脆，不過我會中意再軟少少，唔會咁容易刷損個口，又或者可以考慮加入軟包呢個選擇。餡料嘅豬肉粒餣得夠入味，配上酸蘿白味道豐富，不過越式醬（豬肝醬）就唔係幾食到，如果各樣材料都再多返少少就好，男士可能會唔夠飽。青檸茶好味，甜度適中，檸味夠又唔會太酸。以後食lunch又多個選擇，上環餐廳流轉得好快，希望可以捱得住。