嶼坊

營業中

休息中

因為東涌 Sheraton 有個零房價 staycation，$980 包 $980 餐飲，一個人玩啱啱好。入住當晚就去呢間 Cafe Lantau 食自助餐。因為係星期三閒日，餐廳坐唔滿一半，仲好，人少少唔使迫。整體有得有失，佢嘅賣點相信係燒龍蝦同生蠔任食，但其他嘢例如刺身、carving等嘅選擇較少。最意外係到check out 埋單先知原來呢餐要七百幾蚊，間酒店冇雷公咁遠又唔係特別標青，都要咁貴㗎咩？我形住六百零蚊搞得掂，明顯同期望有個落差。但唔該班炒散伙記專業啲，唔好真係以為傻吓傻吓咁hea足一晚等收工出糧就叫做盡咗責。我食甜品時搵唔到甜品叉，我問個伙記攞隔籬張吉枱隻叉得唔得，佢又懶醒話攞俾我，點知佢唔熟架步搵咗一大輪先拎隻匙羹返嚟，我話我要叉唔係要匙羹喎，佢竟然叫我用番隻污糟叉！？？？早知唔問佢直接攞隔籬枱冇咁嬲。呢啲酒店同餐廳試過就算，如無意外應該唔會再返頭。