尚御潮滷居

營業中

休息中

食完「很得輝」嘅炸雞髀，向前行多兩個街口，買外賣。話說呢間餐廳係前排睇「空肚講宵夜」，有一集講大角咀，其中一樣嘢食就係鵝肝，我見到都好吸引喎，即刻上網摷吓係邊間，終於比我搵到，就係「尚御潮滷居」。酒香鵝肝，半份（$110）因為淺嚐，無要一份，半份已經足夠了（大約有十數片）。師傅切好後，會倒入大約兩三湯匙嘅酒浸住鵝肝，拎到返屋企，打開個盒，酒香味仍有。鵝肝口感十分軟滑，除外層稍稍無咁滑，裡面幾乎入口即溶。因為鵝肝本身浸煮時已經有底味，再加上酒，層次再豐富啲，整體不錯。滷水鵝頭頸，例牌（$68）屬於「外賣優惠專區」餐牌，睇住師傅斬，一直斬，繼續斬，咁多嘅，足足斬咗成個鵝頭+成條鵝頸，真係好大份（諗住例牌，都唔會好多啫）。至於味道，滷水味唔咸（初頭覺得可以再咸少少，味再濃丁丁就好，但食吓食吓，又幾夠味喎），香料味亦有。鵝頸皮滑，接近無肥膏，但鵝頸肉好有咬口，都要有番咁上下牙力先咬得開，但慢慢噒吓骨，嘆下啤酒，都幾疏肝。