影片
更多
2007-06-03
297 瀏覽
週末放工後搞好銀行事情後,走出巴士站玩隨意,結果坐左巴巴入機場。行完T1後走入富豪機場酒店,見到呢間前身為lobby lounge既regala,八卦睇下餐牌時,女侍應好熱情地招呼我,仲叫我睇下如果食物合心水可以試試,見到呢度人少少又幾對眼,既來之則安之。熱盤除肉絲炒麵、炆牛肉外,只試煎三文魚,魚塊煎得頗香,味道淡淡,幸好無腥味!沙律/麵包,沙律菜相當新鮮,加上小量千島汁已經好好味,只可惜無黑醋供應!從巨型三層架夾左青瓜雞肉三文治及煙三文魚法包各一,前者雞胸肉幾厚身同大塊,配上爽脆青瓜片,味道清新;後者造型夠靚,一大片煙三文魚卷成玫瑰花形狀,魚肉同樣地無腥味,好味!只可惜法包稍軟,食落較靱。點心種類比熱盤多,燒賣大大粒有蝦肉及豬肉,不過肉餡淋淋,可以爽口d就好;豬肉卷以酥皮卷住豬肉餡,酥皮幾香,豬肉餡好重香草味,味道幾特別;咖喱雜菜酥外型同豬肉卷相似,內容變為香辣咖喱味道既蔬菜,味道都好濃郁,兩款都ok!越式春卷網狀外皮炸得酥脆,餡料為肉碎、冬菇碎,配合得唔錯,只係蘸料唔用魚露而用泰式雞醬;熱香餅只食左一半,貪得意之作!甜品所佔比例最高,覺得好食款式有:唯一一款中式甜品綠豆沙煲得夠淋,
行完T1後走入富豪機場酒店,見到呢間前身為lobby lounge既regala,八卦睇下餐牌時,女侍應好熱情地招呼我,仲叫我睇下如果食物合心水可以試試,見到呢度人少少又幾對眼,既來之則安之。
熱盤除肉絲炒麵、炆牛肉外,只試煎三文魚,魚塊煎得頗香,味道淡淡,幸好無腥味!
沙律/麵包,沙律菜相當新鮮,加上小量千島汁已經好好味,只可惜無黑醋供應!從巨型三層架夾左青瓜雞肉三文治及煙三文魚法包各一,前者雞胸肉幾厚身同大塊,配上爽脆青瓜片,味道清新;後者造型夠靚,一大片煙三文魚卷成玫瑰花形狀,魚肉同樣地無腥味,好味!只可惜法包稍軟,食落較靱。
點心種類比熱盤多,燒賣大大粒有蝦肉及豬肉,不過肉餡淋淋,可以爽口d就好;豬肉卷以酥皮卷住豬肉餡,酥皮幾香,豬肉餡好重香草味,味道幾特別;咖喱雜菜酥外型同豬肉卷相似,內容變為香辣咖喱味道既蔬菜,味道都好濃郁,兩款都ok!越式春卷網狀外皮炸得酥脆,餡料為肉碎、冬菇碎,配合得唔錯,只係蘸料唔用魚露而用泰式雞醬;熱香餅只食左一半,貪得意之作!
甜品所佔比例最高,覺得好食款式有:唯一一款中式甜品綠豆沙煲得夠淋,味道唔太甜,只可惜欠缺海帶及臭草香味,美中不足!芒果慕絲芒果超甜,mousse都幾滑,最意想不到中間有d椰絲在內,感覺上較豐富,筆左幾塊圍邊朱古力片,原來係瑞士蓮朱古力,好味;熱情果軟忌廉以香檳杯獨立盛載,面頭熱情果汁好濃又甜又酸,一啖食落去的確精神一振!中間軟忌廉應該係芝士,因為食落好香芝士味,以酸甜熱情果汁中和比較膩口既芝士,唔錯。
唔好食甜品種類有一粒圓柱體類似蛋撻既小餅,個人唔鐘意陣味,no good!芝士餅竟然無應有個陣芝士餅味道,質感軟綿綿,同食普通蛋糕無異,no good again!!
水果方面,最甜係菠蘿,雖怕爛口都要食好幾粒,其餘西瓜、蜜瓜都唔錯,沾左少少朱古力噴泉黎食更妙!
自閉發呆地坐左個半鐘,以一杯幾好飲凍檸茶作結,滿足!
服務方面以2位junior 女侍應較熱誠及有笑容,有位著黑色套裝應該較高級既就比較cool,收錢時連應有"多謝"都無句,似乎有商榷餘地。
環境方面尚算舒適,只係紫白色梳化比餐桌高,食野就比較辛苦,而且冷氣有點不足,所以有幾部活動冷風機放係通道,幸而我個自閉位還算多冷氣,而且身後有喇叭傳出輕音樂,令到我呢個自閉發呆tea更舒適!
張貼
