海逸軒 (已結業)

一向甚少惠顧酒店入面嘅中菜廳。覺得價錢太貴之餘質素亦未必好...今次想攪攪新意思，跟太座一家嚟試一試。坐落環境頗舒適，人不多，並不嘈吵，又有seaview，未食先欣賞美景，一樂也...太座要試龍蝦兩味--- 炒球加湯泡飯。都OK吖，冇反對..其餘叫嘅就算係普通家常小菜--- 梅菜五層腩煲、高湯竹笙露笋、荔芋油鴨雞煲...前菜小吃有蒜片一口牛及海蜇頭。兩者用料皆好，牛肉無渣，海蜇頭夠晒爽口大件，但麻油香不夠...五層腩炆得算淰，但未至於入口即化，皮亦因冇乜走過"油"而淰pat pat，冇咗扣肉應有口感；梅菜亦偏甜..露笋感覺好清，大條兼爽口新鮮，配合高湯竹笙，妙不可言，係全晚最出色嘅...荔芋不太夠粉，但椰味足；雞及鴨反而係配角。但若俾我選擇，小弟絕對會去幫襯上環坤記嘅 --- 夠平之餘味道亦更好...龍蝦炒球味道無特別；湯泡飯湯味不夠鮮，西宛呢味做得更出色...甜品係蓮蓉西米焗布甸及合桃露，都做得太甜，不對口味...本來食物不算太突出，但勝在環境搭夠，再加埋AE card 有七五折，力挽狂瀾...