牛角日本燒肉專門店 (已結業)

7‧1假後番工要OT，放工又係宵夜時間咁滯，唔知食乜好，由地鐵站上地面途中見倒牛角廣告，喺香港開店咁耐冇幫襯過，太多人呀！所以就決定上去開餐。還好呢個時間真係唔駛等位，直接安排入座。呢個燒肉夜割時間，幾款燒肉特價由30%到50%不定。我地都點左幾款特價食物，包括王樣腹胸肉(鹽味牛油)﹑上級牛肋肉同芝士雞腿肉，另外點了厚燒煙肉﹑香蒜牛油一口牛同石鍋泡菜豆腐海鮮湯。燒肉工具都幾齊，又有鉗又有剪，點肉既汁醬有三款，我唔記得係咩，只記得好鹹，同埋本身啲燒肉已調味，所以冇乜點食。燒肉逐碟上嘞，賣相其實一般，嗰啲有牛油或芝士既以錫紙兜另上，係將成個兜放上網度燒，燒左肉先，再放入個兜沾牛油或芝士，第一次見。所有食物同平時既燒肉料理差不多，冇話特別出眾，反而泡菜豆腐鍋好味，亦令我想起泡菜國料理。其實以佢既質素，個價錢有點偏貴，但我地喺特價時段食還好啦！要我排隊就唔好了。唔知日本店係咪會好食啲既呢！