壹級日本料理 (已結業)

一大班人話要去食嘢，通常買單都要四，五百蚊一個。可能我哋特別為食。。所以好多時都係揀啲平平哋嘅中式小菜為大家嘅荷包慳下。今日忽然間諗起呢一間日本野，佢嘅價錢相宜得來嘅食物質素又唔錯，所以今餐食咗好多野，除返埋都係二，三百蚊個人，絕對抵食。首先就叫咗個鱈魚干食住先，可以一路等朋友一路食。我好鍾意食呢個，因為咬落去脆卜卜，又香口，仲可以點我最鍾意嘅沙律醬食。跟住就點左幾款唔同嘅串燒，我覺得最特別嘅就係雞皮串燒同埋蘋果豚肉卷。雞皮其實好少會見到做串燒，日本先會常見d。而蘋果豚肉卷就真係系出邊食都無食過，佢嘅配搭真係比較特別。出面係燒烤嘅肉香，薄薄的肉片包住入邊舊蘋果粒，酸酸甜甜又開胃，又好食。蒲燒鰻魚飯呢個又真係幾唔錯，唔似係啲即食嘅鰻魚就咁叮翻熱佢就算。會經過烤一烤，所以有烤嘅香氣，而且份量亦唔少，套餐仲會配埋個面豉湯飲，不錯。如果惠顧套餐仲可以加個三文魚刺身，另外仲會有個三文魚水撥加埋，平時可能好少會食到呢一個位。其實就係三文魚鮨嗰個位置，呢個位嘅油脂會比較多啲，所以食落去好creamy ，好滿足，一定要試下。