新沙洞大排檔 (好順景大廈1座) (已結業)

千祈千祈唔好信笑哈哈食評，呢間嘢性價比簡直係負數。夜晚兩個人食咗三樣嘢：醬油蟹肉蟹膏撈飯($128)、泡菜煎餅($88)、炒辣豬肉生菜包($168)另收加一。個蟹肉蟹膏撈飯完全食唔到蟹肉蟹膏味，由頭到尾都係食緊紫菜撈飯，但收人呢個價。泡菜煎餅冇泡菜味，口感又硬又厚，淨係食緊一堆麵粉，漿住曬成個口，仲要得5-6舊。炒辣豬肉係唯一味道合格嘅嘢食，但無論肉同菜份量都太少，完全對唔住佢個價錢。總括嚟講，基於呢個價錢佢完全俾唔到一個合理嘅質素同份量，菜式有名無實，絕對唔會有下次，除非你好鍾意俾好多錢食又少又唔好食嘅嘢，如果唔係一次都唔建議去試。