Cheeky Dog Hot Dog (已結業)

上次睇完醫生，諗住喺附近醫肚，竟然俾我喺條小巷揾到呢間熱狗店。我見餐廳環境幾chill, 餐牌都幾吸引，最正係佢logo隻老虎狗，就決定試下。我問女店員有咩必食推介，佢見我隻手包紥左，就好貼心咁問我有無野唔食得，我話唔食得辣。佢就介紹左南乳雞翼同「巨鵰」熱狗。南乳雞翼表層酥脆，雞肉嫩滑多汁，南乳味我建議可以加多啲，因為我自己都中意食南乳。「巨鵰」熱狗其實係雞肉腸熱狗，配合佢個醬汁真係好夾，好食。同女店員傾左幾句，先知原來佢係老闆娘（咁後生就做老闆，羨慕）。老闆娘以前做開餐廳（幾出名嘅扒房），一直都想開間自己嘅餐廳，上年年尾就辭工同朋友夾份開左呢間店，一圓老闆夢。每間小店都有佢背後嘅故事，享受美食之餘，更重要係人與人之間嘅聯繫。一定會同朋友再黎試下。