音樂人家 (已結業)

幾個朋友想聚聚，諗下去間靜d既餐廳，有朋友就介紹喱度，話好有氣氛咁。四個人book左檯，睇下個餐牌都幾多野食，有中有西，不過就無扒食。我地叫左兩個小菜，鹹魚雞粒豆腐煲同埋咕嚕班球，兩個焗野，一個係焗石班飯，一個焗雞扒意粉，都幾好喎，雖然無乜特色，不過味道幾好，又夠熱，份量好大碟，普通人一定夠食，特大食個d就唔包啦。餐附中湯，個日係粉葛赤小豆豬骨湯，幾夠火候有的阿媽湯既感覺，每日仲有一杯飲品，我地叫左兩個花茶，原來係一壺上，飲完重好好咁幫我地加水，服務真係夠周到，兩杯特飲（要加十蚊）不過好大杯，味道夠晒濃，唔會水橫橫咁，都抵啦。最特別的是全場客人都唔會好嘈，本來隔離檯都幾大聲講野，服務人員細聲同佢講請佢地細聲的，咁全場都幾好氣氛，最鐘意有人唱歌，唱得好好，原來老闆係舊日名歌星，唔怪得唱得咁好啦。佢唱完重會落黎同客傾偈，好友善。我地都認為依間cafe真係好用心，同一般樓上cafe唔同，不過要幫襯最好先電話訂座，因為成日都有包場，我一定會再黎幫襯，你都一定要試一試，包唔會失望。