大自然素食

營業中

休息中

佛誕，全日食素，所以同女友小熊一齊去大自然，就係咁簡單!我都係果句，我係一個齋口唔齋心嘅人，點知一山還有一山高，搭枱嘅隔離枱客口心都唔齋，條阿叔把聲已經夠響，一坐底就投訴餐廳唔開個好位俾佢要搭枱，又投訴後加嘅靚仔飯遲遲未見，我同小熊打個眼色，快快食完快快走!所以原本想叫兩個木瓜沙律，點一個就算，原本想點焗多士都唔叫，點個瑤柱金菇伊麵，砂鍋雲吞素翅，琵琶豆腐，心諗快D上枱唔該!木瓜唔係我杯茶，沙律如果加上蟹籽就更好味，可惜蟹籽唔係素!瑤柱金菇伊完全食唔到瑤柱，但伊麵炒到比較乾身唔會太多茨汁，哩點我欣賞.砂鍋雲吞素翅唔夾自己口味，雲吞內裡餡料酸菜自己唔欣賞，另一款餡料唔知係咩菜，果種草菁味太強，食一件已放棄!隔離枱果位煩音又係到𠵱𠵱哦哦...... 感覺我係孫悟空遇上唐僧!登登登登登登登! only you...….最後琵琶豆腐外脆內軟，跟隨嘅醬汁以為味道好死唔夠鮮，但又出奇地惹味! 成為今餐最正竟然係哩碟醬汁!今日佛誕餐廳已經特別多客，雖然D姐姐態度已經唔多友善，但一山比一山高遇到D西客又突然間凹哂水! 相信哩件核爆唐僧係熟客D姐姐都買佢怕!阿彌陀佛!