何明記麵家餐廳

營業中

休息中

一年多冇幫襯過啦! 今日荃灣老友兩公婆,特登入元朗搵我食飯,因為去另一間差唔多收鋪,所以過呢度幫襯番。一入電動趟玻璃門,又見到前朝老臣子【嫦姐】,打個招呼後獲派往卡位坐。坐低發現竟然冇晚餐,只有散叫或中式套餐,感覺好似逼人食貴咁。叫【金銀蛋浸白菜仔$38元】、【咕嚕肉$38元】及【鹽焗雞$48元】,跟餐凍飲另加$2元,例湯跟餐送。【金銀蛋浸白菜仔】,個人覺得味道唔錯,白菜仔鮮嫩口感唔錯,可以接受。【咕嚕肉】好細碟唔抵食,味道好一般,但中間有骨應該係生炒骨,廚房竟然連【咕嚕肉】,同【生炒骨】都分唔清楚,感覺好似廣告咁『西芹同西蘭花都一樣!』。【鹽焗雞】又係例牌分量以下,味道及肉質都ok。不過散叫【鹽焗雞】一隻話,由一年前$120元一隻,突加到依家$150元一隻,加幅確係幾犀利下喎!我發覺呢間餐廳內好食品價格,都明顯有好大升幅。雖然服務係唔錯,但硬身木椅坐得唔舒服,加埋仲係得一個方向有電視睇,隔離咁多間有競爭,加價加得咁犀利,而且食物質素一般但分量少,下次都係唔考慮幫襯囉~