香港茶餐廳 (已結業)

正所謂拜得神多自有神庇佑！去完黃大仙還神都差唔多下午一點，於是去隔離嘅龍翔商場醫醫肚！　睇完商場水牌，就扑槌呢間香港茶餐廳！去到唔太多人，裝潢都算光猛闊落！揀左一陣，終於揀左是日午餐A：香茅豬扒煎腸仔意粉（跟湯和餐飲, $38）！不過我揮左好耐手先至有侍應黎落單。。。。整體上，成碟午餐A都乾爭爭 ，因為意粉又冇汁拌，味道好單寡！ 雖然係咁，但意粉Ｄ口感就ＯＫ，幾彈牙又唔覺稔！至於塊香茅豬扒就好乾身，質感好硬又唔夠稔而且食落有渣 ，最重要係Ｄ香茅唔太入味，似普通煎豬扒多Ｄ ，所以我用附上嘅薑蔥蓉撈黎食！另外，煎腸仔就一般，冇咩意見！餐湯（合掌瓜湯）：一碗有２舊瓜，但味道淡如水！ 都係放棄，飲我的餐飲好過！