七重天餐廳 (已結業)

逢星期日出門，都會閒逛炮台山、北角一帶。雖然小店林立，但係每逢週日都難找個位置食嘢。不過嚟到蜆殼街呢條小巷，就有兩間我較為喜歡的餐廳─鬼馬冰室、七重天餐廳：兩間的價錢比較平民化、而且環境及裝修都頗獨特，最重要的是店名夠特別！早排，鬼馬冰室星期日都會開門，可惜最近又改為星期日休息；那沒法子，只好去係正隔離嘅七重天餐廳吧。最近幫襯七重天餐廳，都撞正想食嘅午餐賣哂。咁冇法子，惟有食下午茶餐。其實本身都唔太想食下午茶餐，一來份量細、二來食物都是焗飯、三文治之類，太普通；早排食過「泰式魚餅炒飯」，原來只是將普通急凍魚餅切碎切飯，味道淡到不得了，一啲都唔「泰式」！今次再望吓個餐牌，見到有「卡邦尼意粉」，心諗：應該係比較有特色啦啩……可惜，意粉一上枱，就打咗個突 ─ 一睇就知係烚意粉，加幾PAT忌廉汁同切碎煙肉啦！意粉其實都淋咗啲，撈埋啲忌廉汁就更加淋；卡邦尼意粉的精髓，在於蛋汁，而呢碟意粉不論賣相還是味道，都毫無蛋味可言！洋葱同煙肉都是白烚的。惟一覺得仲食得落嘅，就係杯奶茶─茶夠香，奶夠滑，但可惜補唔返。兩個字形容呢餐─求！其！