宏 (已搬遷) 新店位置

次次行the one都見到呢間「宏」，但佢門面太靚，令我覺得應該會好貴，但今日我決定一探究竟，等我揭開佢嘅神秘面紗。餐廳裝修色彩繽紛，另外亦有獨特嘅日本風格。女友叫左牛肉壽喜燒，只係$99，個人認為肉分量足夠，肉吸收後壽喜燒汁後更惹味。餐廳仲會提供蛋醬，牛肉煮熟後沾上蛋液係日本傳統食法，我自己亦鍾意呢種食法。另外牛肉壽喜燒餐仲包括細抹茶蛋捲，抹茶味非常香濃，甜而不膩。迷你三彩定食啱曬我咁三心兩意既人，一次過滿足我三個願望，包括鰻魚飯、吞拿魚碎飯、鳥冬同沙律。先講鰻魚飯，鰻魚燒得香焦，肉質軟稔，三扒兩撥就食晒。另外，吞拿魚碎飯既吞拿魚非常細滑鮮甜，之前未食過呢種口感既吞拿魚，不過今次之後已經愛上佢。最後海藻烏冬偏向清淡，中和返鰻魚飯同吞拿魚碎飯偏向油膩嘅口感。一個細蛋捲當然唔夠，所以最後叫咗香蕉焦糖窩夫，賣相非常吸晴，窩夫共有三件，質感外脆內軟，仲有一球雪糕，今餐非常滿足。最後埋單只係$347，性價比頗高，睇嚟我係尖沙咀搵到我嘅理想飯堂。