金凱小廚 (已結業)

平時成日見啲餐廳有雞煲加邊爐任食，估唔到美林有間可以串燒、雞煲加邊爐任食嘅餐廳，同朋友去開美林一於試吓！我哋4個女仔去大家都唔係好大食，所以嗌咗個$208餐，有三串自選串燒、一around雞煲同冇限時任食邊爐！串燒我揀咗生蠔、扇貝同燒菠蘿，生蠔同扇貝仲有得揀芝士定蒜蓉燒𠻹，我就揀咗蒜蓉燒，味道好唔錯，燒菠蘿甜甜酸酸勁開胃！之後就開始食雞煲喇，個姐姐好好，上菜時會提醒我地幾多分鐘就食得，我哋幾個女仔掛住傾計佢又會提我哋細火啲，個雞煲我哋嗌咗小辣，都好惹味！ 平時好多餐廳，食完雞煲會直接加湯俾你打邊爐，依間係換個新湯底俾你打邊爐，咁就唔洗咁油膩，值得一讚！個邊爐我哋揀咗花膠雞濃湯，真係有花膠㗎，唔錯唔錯！配料方面都有成30+款，好鍾意佢有啲係以粒／件去嗌，咁就唔怕浪費！個人好鐘意食佢個西班牙黑毛豬，一個人食咗三碟有多！朋友們就好like佢個安格斯肩胛牛肉，唔會好似肥牛咁肥～另外，佢個手打紫菜丸係出面都比較少見，粒丸都幾彈牙，仲有啲爽爽哋嘅紫菜，都幾特別～打邊爐嘢飲都好緊要，依到都有好多款嘢飲任拎，連罐裝啤酒都有！