撈撈雞 (已結業)

星期六下午，難得奶奶幫我地湊三隻小妖，同老公二人蛇出黎去行下，掃下街。臨走前老公話想買野返去比三隻小妖食，我地諗左一陣，又周圍行下睇下有咩係啱小朋友食，行下行下就兜左入有一大堆食店嘅位置（我都唔識形容啦，好似一大個圈咁，入面全部都係小食店），行到入去見到有台式鹽水雞買，就去睇下啦。我地決定叫2份，1份係雞胸肉，1份係雞脾肉，佢每份肉都配3款配菜嘅。雞脾肉配粟米芯，車厘茄，青瓜，鹽水汁。本身有辣汁嘅但我地要比小朋友食所以就叫左鹽水汁啦，雞脾肉好滑，個鹽水汁好惹味，又唔會話太咸，咁當然唔夠台灣嘅香，但都唔錯架啦，青瓜爽脆，車厘茄都新鮮。雞胸肉配芭樂，粟米芯，西蘭花。雞胸肉都煮得出奇地滑，唔係想像中嘅鞋烚烚，但當然比起雞脾就梗係雞脾再滑d啦。芭樂好香，完全令我諗起係台灣夜市掃街嘅感覺。西蘭花又唔會話烚到太淋，都仲有d咬口。估唔到呢間野又真係幾正，不過美中不足係呢度實在太迫啦，係等緊嘅時候比好多人推撞，不過都明白香港嘅土地問題，特別係葵涌廣場想做到美食商場咁。