影片
更多
2015-05-01
2554 瀏覽
五一長假期開始，同屋企人飮茶，特登訂咗間米芝蓮一星嘅德褔利苑，因為夠近，平時去開IFC利苑飲茶，諗住呢間有返咁上下保證，點知中伏！先講訂位，我地訂咗12:45枱，但早到咗12:20左右，同reception 小姐講低個名登記，佢叫我地12:45 再返來因為第一輪未完.... 於是我地12:45返到去，點知超多人... 原來reception 12:45 先開始幫訂咗枱嘅人登記同派枱, 於是啲客癫哂喺到爭攞位... 我問返reception 先知原來我依家先算登記，頭先唔算.... 於是我明明早到變成要排隊等廿張枱.... 都算.... 跟住reception 小姐終於皇恩浩蕩派枱，但係佢地無system無number淨係嗌乜生幾位都唔知邊個打邊個仲要最攞命個reception 小姐鬼咁細聲商場又嘈，搞到啲客要一齊迫到好前等派枱，仲慘過去輪米... 好彩最後都係等咗十分鐘，唔係一定走人。跟住帶位嗰個staff, 又係一個經典，佢帶我地同埋另一個客，先俾咗張窗邊枱嗰個人，跟住我見到隔離有張窗邊空枱，就問可唔可以坐，點知佢眼尾都無望下我地就一邊話你地𥚃面一邊急急腳帶我地入去.... 我問佢點
五一長假期開始，同屋企人飮茶，特登訂咗間米芝蓮一星嘅德褔利苑，因為夠近，平時去開IFC利苑飲茶，諗住呢間有返咁上下保證，點知中伏！
先講訂位，我地訂咗12:45枱，但早到咗12:20左右，同reception 小姐講低個名登記，佢叫我地12:45 再返來因為第一輪未完.... 於是我地12:45返到去，點知超多人... 原來reception 12:45 先開始幫訂咗枱嘅人登記同派枱, 於是啲客癫哂喺到爭攞位... 我問返reception 先知原來我依家先算登記，頭先唔算.... 於是我明明早到變成要排隊等廿張枱.... 都算.... 跟住reception 小姐終於皇恩浩蕩派枱，但係佢地無system無number淨係嗌乜生幾位都唔知邊個打邊個仲要最攞命個reception 小姐鬼咁細聲商場又嘈，搞到啲客要一齊迫到好前等派枱，仲慘過去輪米... 好彩最後都係等咗十分鐘，唔係一定走人。
跟住帶位嗰個staff, 又係一個經典，佢帶我地同埋另一個客，先俾咗張窗邊枱嗰個人，跟住我見到隔離有張窗邊空枱，就問可唔可以坐，點知佢眼尾都無望下我地就一邊話你地𥚃面一邊急急腳帶我地入去.... 我問佢點解唔可以坐窗口邊嗰張枱，佢又係望都唔望就咁走開咗.... 啞哂... 喂大佬，你張枱有人訂咗又好，要最低消費又好，鑲金唔俾坐又好你都回應下都得掛...
一肚氣，算，嗌嘢食... 我地四個人，我知有啲點心一籠三件，我就問個staff嗰啲可唔可以改四件，起初佢唔明，話你地寫咗一二三... 七件點心喎 （其實係七款點心），解釋完佢明白后，就問邊款要四件，咁我就逐様講啦，講到芋角，佢突然好激動，攞支筆好大力敲張枱話：呢様本身就四件啦！喂大佬，我鬼知你邊款三件邊款四件呢，張點心紙又無寫，咁都要俾你寸？！最後芋角嚟咗原來都係得三件... 結果我叫返同一個staff叫佢幫我加返件...
其實呢間啲野食OK，保持水準，蘿蔔糕好味，龍蝦湯貴妃泡飯必點（睇相）。不過食到後期差唔多食哂佢好快收哂我地啲野，又催我地埋單.... 去間所謂高級中餐廳service差過屋企樓下茶餐廳，今日成個感覺好似食完大排檔，我一定唔會再去！
張貼
