鮨心 (已搬遷) 新店位置

呢間樓上日本餐廳裝修幾日本風, 空間感十足, 坐得好舒服。沙律幾大碟, 沙律菜新鮮無渣, 淡淡清甜, 好清新!玉子燒暖暖地食落好鬆軟, 蛋味夠濃, 仲有少少柚子味, 少左份單調既感覺, 超正。刺身夠新鮮, 食落好鮮甜, 入口甘香。尤其鍾意三文魚, 脂香滿溢, 有入口即融既感覺。鰻魚卷特別在加左牛油果, 添左份軟滑同香氣, 亦令鰻魚卷冇咁膩。鰻魚鹹香惹味, 軟滑無骨, 唔錯。免治雞肉串外層少少脆, 咬一口, 肉汁不斷流, 調味亦啱啱好! 最後嚟個清新既甜品做結尾。水信玄餅比較淋, 冇乜口感, 連埋黃豆粉一齊食, 健康又唔甜膩。呢餐日本菜無論邊方面都好出色好滿意, 值得encore!