一寿司 (已結業)

係尖沙咀搵食，見好耐冇幫襯過一壽司，所以就決定入去食。平時黑夜壽司咁多人等，我地一行兩個人都決定唔等到十點就去食，因為真係好肚餓！我入到去就寫紙落order, 等左好耐都未有野食黎，係迴轉枱見到個吞拿魚沙律就拎左碟黎食左先！ 賣相都算唔錯，不過吞拿魚不夠新鮮，味道不過不失啦！之後又繼續等，等到個冷面到！ 兩隻餓鬼好快就清左個冷面喇，之後繼續等壽司黎！好奇怪點解壽司要整咁耐，唯有催單啦！原來電腦壞左！！大佬，要人手入單，你都同啲客講聲丫，咁都冇計，繼續等！啲壽司一到，就食哂，相都冇影到。。。其實當晚嘅人客絶對唔多，但係做野嘅人相當混亂！食飽就梗係快快趣埋單啦，點知埋單都等左二十分鐘！仲要已經不停催個侍應！隔離枱都叫埋單，最後頂唔順去左cashier 度計，咁我地為免再等落去，梗係有樣學樣啦！之後過到去，火都黎！原來我地張枱嘅單都仲未計！有冇搞錯呀！都叫左埋單咁耐，我仲要企係度等你用計數機慢慢計？！我明白電腦壞係會有影響！不過應該都要有危機處理丫！仲要收我加一服務費，完全冇服務可言囉！！食到一肚火！