生記滷味

營業中

休息中

今日放工去開紅磡拎嘢，到食飯時間肚餓， 行過見到呢間， 見到蔡瀾張相即刻衝入去。嚟到滷味店一定係食滷水鵝， 所以我諗都冇諗就叫咗滷水鵝飯，上到枱時見到係鵝脾，內心即刻充滿驚喜。之後店員好有禮貌送個例湯給我，其實呢啲滷味/燒味嘅店舖，嗰個例湯一定好好味，每日大量頭頸，根本就唔需要加味精，個湯已經好飲，呢度嘅例湯亦都係，飲完唔會有口渴嘅感覺。講返滷水鵝飯，我嘅數量唔算太多，應該有7/8件左右，開頭我以為係滷水鴨，仲諗住叫個師傅對一對，但望多兩眼應該係滷水鵝飯，相對其他嘅滷水鵝飯，份量係少咗啲，而且亦都冇豆腐同埋酸菜。味道方面，我食第一口，已經感覺超級鹹，我唔知點解，佢係有滷水嘅香味，但比鹹味蓋過了，雖然叫做鵝髀，但係都比較偏瘦，最重要一樣，係師傅沒有將佢起肉，因為之後每一件鵝肉，都充滿細骨，而且啲骨仲跌咗落啲飯到，食嗰陣時要非常小心，而且嗰啲飯仲好似唔係好熱，食落去嘅感覺唔係太好。一碟滷水鵝飯多謝$55，對比一間咁有名氣嘅滷水鵝店，係一個合理價錢，但係味道就真係有點失望。可能因為有蔡瀾嘅原因，所以大家對呢間店舖嘅期望值都會提升，如果呢間是街市或者無名氣嘅舖頭，我相信一定冇投訴。