夏雪 (已結業)

今次同喺比利時讀書嘅表姨甥黎大圍食個甜品。原來喺比利時基本上係冇齋食甜品嘅糖水舖，如果你要食甜品，就只可以去正式嘅餐廳食成set嘅dinner, 到最後先可以order甜品，而且仲好貴，所以變相係少左機會食。我表姨甥佢近一年來番過黎3幾次，不過都冇食過夏雪，今次特登帶佢黎食下。我地差唔多10點先入座，不過今晚唔係好多人，一入到去就有位。表姨甥一見到個menu就兩眼發光，樣樣都想試，不過佢最後都係揀左佢最鍾意嘅朱古力：魔鬼窩夫。叫完都要等15分鐘先到架，傾住計等就岩晒。一黎到，大家都驚嘆左一下，因為擺得真係好靚，賣相好吸引。而最重要唔係得個靚字，個心太軟勁爆漿，而且唔會太甜，食到唔停得口！個窩夫都好鬆化，配埋朱古力雪糕一齊食，一啲都唔腬，真係好正呀！我個表姨甥雖然食得多比利時朱古力，但都表示非常欣賞呢份魔鬼窩夫，佢仲差啲想用脷lam埋隻碟！呢間值得再試！