瀧

營業中

休息中

訂咗枱咁耐，早幾日終於試到瀧嘅omakase。叫咗kiwami omakase “極”，有先付、前菜、湯、刺身、天婦羅、合肴、日本牛肉、食事及甜品，總共9道菜。首先嚟嘅先付係松葉蟹配海膽蟹膏昆布啫喱。啖啖肉之餘，海膽同蟹膏唔會掩蓋大家嘅味道，好清新，好啱做開胃菜。第二道前菜係北海道白粟米、海鹽炸銀杏、海老釀明太子、蠑螺，先後次序亦由白粟米順時針開始食。白粟米生食特別甜，銀杏配上海鹽更可口，海老明太子同蠑螺清新爽甜。第三道菜係鮑魚清湯配柚子皮，清一清味蕾最適合不過。第四道係刺身，有拖羅、深海、赤龍，可配葱花或生薑或即磨山葵，點少許醬油。第五道天婦羅，有海蝦、海老頭、目干魚、日本海鰻及大蜆天婦羅配京都萬油蔥。天婦羅可配上靜岡白蘿蔔、椒鹽及檸檬汁食用。第六道係合肴，有山芋魚肉茶碗蒸。第七道日本和牛，入口即溶，配以少少鹽，更帶出牛嘅肉汁。第八道係紫蘇葉天婦羅配梅冰梅蘇麵，清香唔會太酸，齒頰留香。最後甜品，有生炸紫甜薯及蜜瓜晴王。甜薯可配白蘭地點糖，連皮食，令人一試難忘！蜜瓜晴王果味濃郁，清甜爽口。