六合小廚 (已結業)

經過尖沙咀apple 隔離有橦大廈好多人企起樓下，原來有好多間食店，我睇open rice見到六合小廚都幾多好評就試一試。見到人地食個蒜蓉蝦蒸腸粉好吸引，原來係下午茶2點至6點新推出，$56又唔貴喎，平時蒜蓉蝦多數烏冬，陳村粉或粉絲底，腸粉又真係第一次試。個腸粉好滑但又有咬口，唔會過淋散晒，配埋個海鮮豉油，好夾，蒜蓉都好香好味，食完都唔會好口渴。另外點左個六合牛四寶麵，有牛腩、牛根、牛肚、牛腸 $78，都幾貴，唔算太大碗，不過六合牛四寶好好食，特別係牛肚，食到裡面粉粉地。食麵配個郊外油菜最好不過，菜心就煮得淋左少少，但幾岩我。見好多人有食秘制蜜椒土豆牛腩粒 $108，我又試下，個秘制蜜汁好正，蜜糖甜甜地，好似燒野食咁，薯仔外脆，裡面就起沙，好味。反而牛腩粒就無咁出色，如果係牛仔骨或牛柳粒會仲好味。仲叫左2杯飲喎，一杯凍檸茶，一杯熱柚子蜜。總括呢間六合野食好食，有水準，可惜地理位置關係，就唔係太多人認識嚕。