金蘭花泰國菜館

營業中

休息中

今日同朋友講開電話，話好耐無去九龍城食泰國菜，咁啱我地今晚都得閒，就約埋一齊去金蘭花食飯。先叫咗泰式柚子沙律，柚子好甜好多汁，加埋菠蘿同木瓜絲，好爽口。明爐烏頭魚鍋，食泰國菜一定會叫，條魚肉質好新鮮，而且無泥味，面頭鋪滿鹹檸檬同香菜，個爐滾吓滾吓，條魚就可以保持住熱辣辣，真係好好食。黃咖哩羊肉，其實平時多數食牛腩，不過朋友話今晚想食羊，就試吓新口味，羊肉煮得好淋，一D都唔韌，而且又無羶味，D咖哩好香又唔會太辣，薯仔都好綿，好入味。蒜茸法國麵包，蒜蓉味勁香，麵包好脆，點埋個黃咖哩一齊食，味道一流。馬拉盞炒通菜，新鮮熱辣，好鬼惹味。甜品叫咗千層糕，煙煙韌韌，仲有D暖暖地，椰汁味好濃。面頭仲有一片薄薄地嘅椰青肉，好清新。飲品叫咗鮮椰青，夠晒凍，又甜又解渴，飲完一個唔夠喉，叫兩個就啱啱好。其實，金蘭花喺九龍城已經好耐，D味道同服務都 keep 住好好，真係好難得。