雙生館 (已結業)

今日剛剛喺長沙灣見完個客，順便去明愛醫院探個朋友，經過一個餐廳門口，幾骨子幾靚，以為佢係cafe，睇清楚門口個牌，原來佢哋有麵，有餃子食。咁就入咗去試下，跟住有個靚女走埋嚟介紹有乜嘢食。佢話今日有個special叫藥膳牛腩，可以跟米粉烏冬、關廟麵和刀削麵。我都唔知咩叫做關廟麵，所以我就叫咗藥膳牛腩關廟麵試。原來關廟麵系台灣麵，我而家至知。唔試由自可，一試不得了。而家外面啲牛腩做得好硬，好難趙，無以前做得咁腍，咁綿。但係佢煮得好好，而且啲藥膳味入晒牛腩裡面，但又唔會太濃。靚女叫我先試個湯，佢話呢個係羊肚菌湯，冇落味精。我試後，真係好好飲，全部飲晒。外面好多餐廳都話冇落味精，但係我飲完之後都會好口渴，但佢哋唔會。為咗證明我冇講大話，我影咗before and after啲相。除咗麵和餃子之外，我仲見到隔離食緊三文治和蛋餅，啲三文治唔係外面的茶餐廳三文治，係用歐式麵包夾成嘅三文治，好鬼酒店feel，但係因為唔系我食，所以冇影相。仲有人買咗佢啲麵包走，佢哋話啲麵包係自己做。個靚女同個客傾咗好耐，但我唔明佢哋講啲乜，但係好似好專業。我下次一定要嚟試下佢哋其他嘢。呢間餐廳真系值得推介。