鳥華亭

營業中

休息中

準備7月去東京嘅行程發現東京有間好出名嘅白雞湯拉麵，因為喺香港主要食嘅拉麵都係豚肉，於是就試吓搵搵香港有冇白雞湯拉麵，果然皇天不負有心人，比我搵到灣仔有一間，於是就二話不說拉埋另一半同我去食。打開拉麵店嘅趟門，感覺就好似用咗隨意門即刻去到日本嘅感覺，日式裝修，左邊係Bar枱右邊係普通座位。而點菜嘅落單紙好細心，一面係繁體字，另一面係日文字，座低後其實發現有一半食客都係日本人。點咗兩個拉麵+一款小食，包括：特盛雞白湯拉麵+至極白湯拉麵+煎餃子特盛雞白湯拉麵選擇咗捲曲麵，而配料有雞肉、糖心蛋、紫菜、露筍、竹筍同埋炸蓮藕片。食拉麵最緊要係先飲一啖湯，濃濃嘅雞湯濃到有些少黏口嘅感覺；再食一啖雞肉，慢煮嘅雞肉入口非常嫩滑；糖心蛋亦非常入味！捲曲麵每一啖都掛上白湯，入口彈牙！至極白湯拉麵選擇咗直身麵，而配料有雞肉、糖心蛋、露筍、混合蔥同埋炸蓮藕片。由於配咗混合蔥，湯味就添上一份清新蔥味。直身麵食落就感覺爽口一D。煎餃子皮薄肉汁豐富！