味 (已結業)

銅鑼灣有間爐端燒叫做「炭」相信好多人都識，出名在於隱身在一幢色情場所場大廈內，食物都認真好食，但另一樣最馳名的就是大油煙，食完邊度都唔駛去，即刻要返屋企沖涼同洗頭。因為呢個原因，所以都有一排冇去，忽然間發現以前在「炭」的師傅過了檔，如果可以唔一身油煙又可以食到好嘢，咁就正嘞。 平日夜晚來到跑馬地景光街，餐廳名「味」，記十次都應該記唔到，唔緊要，好食就記得。一入門口，嘩，好細喎間舖，一條走廊條仔，放到好窄嘅3, 4 張4人枱，轉彎一張六人枱，都幾迫。 食物方面，好多都係「炭」嘅名物，例如：炸𩶘魚、厚燒牛舌、鵝肝蛋飯。炸𩶘魚，連埋魚麟一齊炸，果然做到「炭」個水準。厚燒牛舌都有七、八成，酒煮蜆都幾好，不過呢幾樣之外，其他就有段距離，尤其是食物火喉控制方面，串雞腎完全冇燒過嘅痕跡。又話「炭」個師傅過咗去，係，不過當晚只見到一個，另一個叻啲嘅唔見影。另外呢，食物用料都差少少，例如粟米味道幾好，但唔夠嫩，雞翼有雪藏味；青椒仔幾好，冬菇錯晒，煙肉蕃茄又ok，一餐拉勻來講，都俾作合格啦。 價錢係比「炭」平，會唔會再去？可能去多一次，睇吓另一個師傅喺唔喺度先。 有一個賣點，就係免開瓶，最啱嗜酒人士。